Claude Code للمصممين — إزاي تبني مواقع كاملة من غير ما تكتب كود

أنا مصمم، مش مبرمج. بس الموقع اللي أنت بتقراه ده — ehabfayez.com — اتبنى بالكامل باستخدام Claude Code.

مش بهزر. كل صفحة، كل component، كل animation، وحتى الـ dashboard اللي بدير منه المحتوى — كل ده اتعمل عن طريق إني بتكلم مع Claude في الـ terminal وهو بيكتب الكود.

يعني إيه Claude Code؟

Claude Code هو أداة CLI (Command Line Interface) من Anthropic بتشتغل في الـ terminal بتاعك. الفكرة بسيطة: أنت بتوصف اللي عايزه بالكلام، وClaude بيكتب الكود وبينفذه.

Terminal مفتوح بيشتغل على كود مشروع

مش مجرد chatbot بيديك code snippets — لا ده بيقرأ ملفات المشروع بالكامل، بيفهم الـ codebase، بيعدل على ملفات موجودة، وبيعمل ملفات جديدة.

ليه ده مهم للمصممين؟

١. الفجوة بين التصميم والتنفيذ اتقفلت

طول عمرنا كمصممين بنعمل mockups وبنستنى developer ينفذها. ودايماً في حاجات بتطلع مختلفة — spacing غلط، ألوان مش بالظبط، animations مش زي ما تخيلناها.

دلوقتي أنا بصمم الحاجة وبنفذها بنفسي في نفس اللحظة. لو عايز الـ padding يبقى 24px مش 20px — بقولها وبتتغير في ثانية.

٢. Prototyping بقى Real

بدل ما تعمل prototype في Figma بـ fake interactions، دلوقتي تقدر تبني الحاجة الحقيقية. الـ search بيشتغل فعلاً، الـ dark mode بيتبدل فعلاً، الـ animations حقيقية.

٣. سرعة مش طبيعية

الموقع ده فيه أكتر من ٣٠ صفحة ومئات الـ components — واتبنى في أيام مش شهور. Claude بيكتب الكود بسرعة مش بشرية وبجودة عالية.

Dashboard لإدارة المحتوى اتبنى بالكامل بـ Claude Code

إزاي ببدأ عملياً؟

الخطوة ١: جهز المشروع

بستخدم Astro كـ framework لأنه سريع ومرن. بس تقدر تستخدم أي حاجة — Next.js، Svelte، حتى HTML عادي.

الخطوة ٢: اتكلم بوضوح

السر في إنك توصف اللي عايزه بوضوح. بدل ما تقول “اعملي navbar”، قول:

“اعمل navbar ثابت في الأعلى، فيه اللوجو على الشمال واللينكات على اليمين. على الموبايل يبقى floating bottom bar بأيقونات. استخدم glassmorphism effect.”

كل ما وصفك يبقى أدق، النتيجة بتطلع أحسن.

الخطوة ٣: راجع وعدّل

Claude مش بيطلع حاجة perfect من أول مرة — بس بيطلع حاجة كويسة جداً وبعدين بتعدل عليها. وده بالظبط زي ما بتعمل مع developer — بتراجع وبتدي feedback.

حاجات اتفاجئت بيها

Claude بيفهم RTL كويس — مش بيعكس حاجات غلط
بيعرف يعمل SEO — meta tags، structured data، sitemap
بيقدر يعمل dashboard كامل — مع authentication وCMS
بيتعامل مع APIs — YouTube API، GitHub API، Redis

مش كل حاجة وردي

في حاجات لازم تكون واعي ليها:

لازم تفهم basics: مش لازم تبقى مبرمج، بس لازم تفهم إيه هو HTML/CSS/JavaScript عشان تقدر تراجع الكود
الـ context مهم: لو المشروع كبّر أوي، أحياناً Claude بينسى حاجات قولتهاله قبل كده
Testing عليك: أنت اللي بتختبر النتيجة — على browsers مختلفة وأجهزة مختلفة

الخلاصة

Claude Code مش بديل للمبرمجين — بس هو بيدي المصممين superpower إنهم يحولوا أفكارهم لمنتجات حقيقية. لو أنت مصمم وعندك فكرة لمشروع — جربه. النتيجة هتفاجئك.